Mba tiako zaraina aminareo fotsiny ny andro anio... Izay dadanay izay mantsy, efa lasana nody

Tsy dia fanaoko loatra ny mitantara ny fiainako antsimpirihany eto amin'ny blaogy kanefa androany kosa dia tsy mety afaka am-poko raha tsy manoratra eto aho.

Manontany tena aho mantsy hoe: "nanao ahoana ny fiainako raha tsy nandao an'i Madagasikara aho, ka nijanona teo anivon'ny ray aman-dreniko?"

Nanao safidy aho anefa ...

Ary hatramin'izay nialako tany an-tanindrazako izay dia tsy nitsahatra aho namisavisavisa ny famoizako mandrakizay ny iray amin'ny ireo nahitako masoandro. Tanteraka izany... roa taona izao.

Ny tena mafy? tsy afaka nanao veloma farany aho! Noheveriko fa mangidy tsy hay leferina ny fisarahana an-tany. Hay mbola mafy noho izany...

Mitohy anefa ny fiainana. Mbola hifankahita tokoa ve any aoriana any?